Ağdamda Ermənistan istehsalı olan mina tapılıb


Siyasət 11 Noy 2017 17:12:51 250 0

Ağdamda Ermənistan istehsalı olan mina tapılıb

Daşınması mümkün olmadığına görə mina partlayış yolu ilə yerində zərərsizləşdirilib

Ağdamda 1 ədəd minana aşkarlanıb. 

Ərazilərin Minalardan Təmizlənməsi üzrə Milli Agentlikdən (ANAMA) "Report"a verilən məlumata görə, mina rayonun Əfətli kəndi ərazisində tapılıb. 

Belə ki, Fövqəladə Hallar Nazirliyinin Böhran Vəziyyətlərində İdarəetmə Mərkəzindən və Daxili İşlər Nazirliyinin ″102″ Xidməti-Zəng mərkəzi sistemindən agentliyə Ağdam rayonu, Əfətli kəndi ərazisində 1 ədəd minanın olması barədə məlumatlar daxil olub.

Məlumatlara əsasən agentliyin xüsusi mobil çevik əməliyyat qrupu dərhal həmin əraziyə göndərilib.

Agentliyin mütəxəssisləri tərəfindən həmin ərazidə Qarqar çayının sahilində 1 əkin sahəsinə baxış keçirilib. Aparılan təcili təxirəsalınmaz operativ əməliyyat axtarış tədbirləri nəticəsində 2015-ci il Ermənistan Respublikası istehsalı olan 1 ədəd piyada əleyhinə mina (PMN-Э) aşkar edilib. Daşınması mümkün olmadığına görə mina partlayış yolu ilə yerində zərərsizləşdirilib.

Aşkar olunan minanın ətrafında 12 000 kv.m əraziyə yerüstü baxış keçirilib, bundan əlavə təhlükəli əşya və qurğu aşkar edilməyib.