"Report": Bu gün dolların hərəkət trayektoriyası müəyyənləşəcək
Digərləri 13 Okt 2017 12:48:24 161 0
Analitiklər ABŞ-da inflyasiyanın sürətlənməsini gözləyirlər
"Report"un analitik qrupu dünən açıqlanan müsbət göstəricilərin dolların məzənnəsinə təsirinin bugünkü inflyasiya göstəricisinin açıqlanmasından sonra olacağını bildirir. Əgər inflyasiya göstəricisi 0,2% proqnozdan artıq olarsa, dollar sürətlə möhkəmlənəcək. Əks halda, dolların ucuzlaşmağa davam edəcəyi və bu prosesin 2018-ci ilin ilk yarısının sonuna qədər davam edəcəyi mümkündür.
"Analitik təhlillər onu deməyə imkan verir ki, istehsal qiymətləri indeksinin artması bugünkü inflyasiya göstəricisinə də müsbət təsir edəcək. ABŞ-da qasırğalar səbəbindən benzin qiymətlərinin artması və saathesabı əmək haqqının yüksəlməsi inflyasiyanın artmasına səbəb olacaq. Əgər inflyasiya göstəricisi proqnozları üstələsə, FED-in dekabrda uçot dərəcəsini artırması dəqiqləşəcək. Bu da öz növbəsində əsas valyuta cütlüyü olan avro/dolların ilin sonuna qədər 1,14 USD/EUR səviyyəsinə kimi geriləməsinə gətirib çıxaracaq", - deyə analitiklər əlavə ediblər.
Qeyd edək ki, hazırda USD/EUR 1,1830 səviyyəsində qərarlaşıb.