Qənirə Paşayeva: “Avropa ölkələri İordaniyaya dəstəklərini artırmalıdırlar”


Siyasət 11 Okt 2017 03:59:19 412 0

Qənirə Paşayeva: “Avropa ölkələri İordaniyaya dəstəklərini artırmalıdırlar”

“İordaniya bu gün "mədəniyyətlərarası dialoq"da fəal rol oynayan ölkələrdən biridir”

Azərbaycanlı deputat Qənirə Paşayeva Avropa Şurası Parlament Assambleyasının (AŞPA) payız sessiyasında İordaniya ilə bağlı müzakirələr zamanı azərbaycanlı köçkünlərdən danışıb və çoxlu sayda qaçqını olan ölkələrə dəstəyi artırmağa çağırıb.

"Report" un Fransa bürosu xəbər verir ki, millət vəkili “İordaniya Parlamentində demokratiya naminə əməkdaşlığın qiymətləndirilməsi” adlı qətnamə layihəsinin müzakirəsi zamanı “Azad Demokratlar Qrupu” adından çıxış edib və Assambleyanı dəstəyə səsləyib:

”Mən bir müddət əvvəl İordaniyadaydım. İordaniyalı rəsmilər, qeyri-hökumət təşkilatları və KİV-i ilə görüşmək və söhbət etmək imkanım oldu. Bu müddətdə həm İordaniyanın demokratiya və inkişaf yolunda qət etdiyi yolu, həm də bu yolda qarşılaşdığı məsələləri yaxından gördüm. Mən İordaniyalı dostlarımızı demokratiya və inkişaf yolunda əldə etdikləri uğurlardan dolayı təbrik edir, bu yolda daha çox uğurlar əldə etmələrini arzulayıram. İordaniyanın həm AŞPA ilə yaxın əməkdaşlığı çərçivəsində, həm də qısa zamanda demokratiya və insan haqları məsələsində qət etdiyi yol hər cür dəstəyə layiqdir. İordaniyadakı bu müddətlər çox önəmlidir və bütün bölgəyə müsbət şəkildə təsir göstərə biləcək hadisələrdir. Bu səbəbdən buradan İordaniyaya dəstəyimizin qərarlı şəkildə davamlı mesajının verilməsi son dərəcə önəmlidir”.

O bildirib ki, son illərdə İordaniyanın da daxil olduğu Orta Şərq coğrafiyasında II Dünya müharibəsindən bu yana insanlıq tarixinin ən böyük dramı yaşanmaqdadır.

“Suriyada davam edən daxili müharibə, bölgə insanlarının yaşadığı faciə və müharibə ilə birlikdə meydana gələn "köç dalğası" təbii ki müharibənin yaşandığı bölgəyə ən yaxın ölkə olan İordaniyaya da öz dərin təsirini göstərib. Bu gün sayı on minlərlə olan suriyalı qaçqın İordaniyada yaşayır. Türkiyədən sonra ən çox suriyalı qaçqın qəbul etmiş ölkə İordaniyadır. Bu səbəbdən həm Türkiyə, həm də İordaniya hökumətlərinə və iki ölkənın xalqlarına qaçqınlara göstərdikləri yardımdan dolayı təşəkkür etməliyik. Mən buradan bu iki ölkənin bütün rəsmilərinə və hər iki ölkənin xalqlarına təşəkkür edirəm. Torpaqlarının 20 fazinin işğal olunması səbəbindən 1 milyon insanı qaçqın və məcburi köçkün düşmüş bir ölkənin təmsilçisi olaraq qaçqın axınına məruz qalan ölkələrin yaşadığı problemləri də çox yaxşı bilirəm. Sayı yüz minlərlə, milyonlarla olan qaçqınların həyatı əsas məsələ olduqda, bu, qaçqın axınına məruz qalan dövlətin və hökumətin bütün proqramlarının həyata keçirilməsinə öz təsirini göstərir, prioritetləri dəyişir, qaçqınlar və onların problemləri gündəmdəki ilk sıranı tutur. İordaniyada olduğum müddət ərzində Suriyadan gələn qaçqınlarla da görüşdüm. Vətənini, evini, yurdunu tərk etmək bir insan üçün dözülməz bir acıdır. Bu insanların dərdlərinə çarə, acılarına əlac olmaq isə böyük fədakarlıqlar tələb edir. Bu səbəbdən Avropa ölkələri və qeyri-hökumət təşkilatlarının İordaniyaya dəstəklərini artırmaları lazımdır. İordaniya dini və etnik tərkibi etibarilə bu gün Avropa, dünya və insanlıq üçün çox önəmli olan "mədəniyyətlərarası dialoq"da fəal rol oynayan ölkələrdən biridir. Bu üzdən İordaniya Məclisinin üzvlərinin indi bizimlə birlikdə olmaları həm Avropa, həm də AŞPA üçün son dərəcə önəmlidir. Biz “Azad Demokratlar Qrupu” olaraq AŞPA ilə İordaniya arasında əməkdaşlığın qurulması və inkişafı üçün hər cür dəstəyi verəcəyimizi, iordaniyalı məsləkdaşlarımız və bütün İordaniya xalqı ilə əməkdaşlıq etdiyimizi bəyan edir, İordaniya hakimiyyətinin AŞPA ilə əməkdaşlığı çərçivəsində həyata keçirəcəyi layihələrin, islahatların uğurlu olmasını diləyirik", - deyə azərbaycanlı millət vəkili bildirib.

Vusalə İsmətqızı